القسم الادبي
سنة ورا سنة
فاتت سنة من عمرى
وسنة بتجر سنة
وسنة بتجرى تلحق سنة
وانا لسه زى مانا
بعيد عنك يارب
قلبى قاسى عليك يارب
كل يوم فى شر وخطية جديدة
وقلبى مش عايز يتوب
ولا يقول ابتدى بداية جديدة
كل يوم خطايا وشرور امر
ولا قلبى بيحرم ولا بيقول تبت
كل يوم اغرس شوكة فى جبينك بارادتى
وادق مسمار فى ايدك بايدى
امسك حربة واطعن جنبك
واقول استحمل مانا ابنك
كل يوم بسياط اجلدك
وبرضه اقولك انا ابنك
اجرح واالم فيك واجلد
وانت بحنان تضم وتطبطب
تطبطب عليا يارب وتاخدنى فى حضنك
تقولى تعالى يابنى
حضنى يساعك رغم اثامك
قلبى مسامح رغم شرورك
فاتحلك ايدى تعالى فى حضنى
تعالى يابنى ماليش غيرك
فاتحلك ايدى على الصليب
ماددلك ايدى تعالى من غير تفكير
هاتلاقى حنانى وحبى ماليك
هاتلاقى خطاياك مغفورة ليك
تعالى يابنى لحضن ابوك
وحشتنى كلمة محتاجك يا حنون
ورغم كل ده بجرح فيك يارب كل يوم
اسمع كلامك ده كل ثانية وكل يوم
واقول من حنانك هاتسامح وتغفر الذنوب
وافضل تايه فى خطيتى سنين وسنين
واهى سنة بتجر سنة
وسنة بتجرى تلحق سنة
وانا لسه فى شرورى زى مانا
